يعني إيه اتصالات كاش
اتصالات كاش هي محفظة الكترونية تقدر تستخدمها على موبايلك وتقدر تودع وتسحب فلوس من أي فرع من فروع اتصالات أو ماكينة ATM وتقدر تشحن رصيد موبايلك وأي رقم اتصالات أخر وتدفع فواتير موبايلك وتدفع فواتير الكهرباء والمياه والغاز وكمان تقدر وتشتري أون لاين.
ازاي اشترك في اتصالات كاش
علشان تقدر تعمل محفظة اتصالات كاش زور أقرب فرع من فروع اتصالات ومعاك الخط اللي هتعمل عليه محفظة اتصالات كاش وبطاقتك الشخصية وإنشاء المحفظة وبعدين هتوصلك رسالة صوتية علشان تعمل رقم سري جديد مكون من 6 أرقام صلاحية الخدمة مدى الحياة ، كما يمكنك إيقافها في أي وقت من خلال زيارة أقرب فرع من فروع اتصالات.
ازاى اشترك فى اتصالات كاش من البيت
تقدر تشترك في خدمة اتصالات كاش من البيت وانت في مكانك ، كل اللى عليك يكون الخط مسجل برقمك القومي واطلب *777# من موبايلك وادخل رقمك القومي ثم ادخل كلمة مرور مكونة من 6 أرقام
ملحوظة : صلاحية محفظة اتصالات كاش اللى عملتها من البيت 3 شهور فقط ولو عايز تخليها مدى الحياه زرو أقرب فرع اتصالات ليك علشان تسجل باقي البيانات
مميزات اتصالات كاش
- تقدر تعمل إيداع أو سحب فلوس من أي فرع من فروع اتصالات أو ماكينة ATM بالتعاون مع شبكة ميزة ( البنك الأهلي المصري ، بنك مصر , بنك القاهرة ، بنك الإسكندرية ، البنك التجاري الدولي ، بنك قطر الوطني ، بنك قناة السويس ، المصرف المتحد ، بنك عوده ، البنك الأهلي المتحد ، بنك الإسكان والتعمير ) وكمان هتقدر تعمل سحب وإيداع من ماكينة فوري
- تقدر تحول وتستقبل فلوس من أي محفظة الكترونية تانية في مصر.
- تقدر تشحن رصيد لموبايلك وأي رقم اتصالات تاني.
- تقدرتجدد باقتك وتدفع فاتورتك.
- تقدر تدفع فواتير الكهرباء والمياه والغاز والانترنت والجامعات والمدارس والنوادي وغيرها كتير
- تقدر تشتري وتدفع أون لاين من أي موقع عالمي عن طريق استخراج بطاقة ماستركارد وبيصلك بيانات الكارت في رسالة وصلاحية الكارت 24 ساعة فقط من استخراجه ويستخدم لمرة واحدة وفي حالة وجود رصيد متبقى بيرجعلك تاني على محفظتك.
- تقدر تتبرع للمؤسسات الخيرية وانت في مكانك.
مصاريف السحب والإيداع من محفظة اتصالات كاش
1% من قيمة أي سحب كاش بحد أدنى2 جنيه عند السحب من أي فرع من فروع اتصالات او ماكينات فوري
طريقة ايداع اتصالات كاش من ATM
تقدر تعمل إيداع في حسابك على اتصالات كاش من خلال ماكينة ATM
- زور أقرب ماكينة ATM متاح فيها الإيداع
- اختر خدمات بدون بطاقة من على شاشة ATM
- اختر ايداع
- ادخل رقم الموبايل
- ادخل الرقم السري الخاص بحسابك
- ادخل الفلوس في المكان المخصص لها في ماكينة ATM
طريقة سحب اتصالات كاش من ATM
تقدر تسحب فلوس من حسابك على اتصالات كاش من خلال ماكينة ATM
- زور أقرب ماكينة ATM
- اطلب من موبايلك *777*3#
- ادخل المبلغ اللى عايز تسحبه
- ادخل رقمك السري الخاص بحسابك في اتصالات كاش
- انتظر لحظات وهتصلك رسالة فيها رقم سري مؤقت واللى هتستخدمه عند السحب من ماكينة ATM
- اختر خدمات بدون بطاقة من على شاشة ATM
- اختر سحب
- ادخل رقم الموبايل
- ادخل المبلغ اللى عايز تسحبه ويكون مطابق للرقم اللى كتبته في أول مرة
- ادخل الرقم السري المؤقت اللى وصلك في رسالة
- انتظر لحظات وسيتم استخراج الفلوس من ماكينة ATM
رسوم السحب من ماكينات ATM
1% بحد ادني 1 جنيه رسوم من اجمالي المبلغ في حاله السحب من ماكينات الصراف الالي
ازاي استخدم اتصالات كاش
تقدر تستخدم جميع خدمات اتصالات كاش من خلال تطبيق اتصالات كاش أو تطبيق My Etisalat
اكواد اتصالات كاش المختصرة
| الخدمة | الكود |
|---|
| القائمة الرئيسية لخدمات اتصالات كاش | *777# |
| تحويل فلوس | *777*1# |
| شحن رصيد | *777*2# |
| سحب من ماكينات ATM | *777*3# |
| رصيد محفظتك | *777*4# |
| معاملات فوري | *777*5# |
| كارت الشراء أون لاين | *777*6# |
| دفع فواتير المرافق | *777*7# |
| تغيير الرقم السري | *777*8# |
| دفع فاتورة الموبايلك | *777*9# |
| للتبرع للمؤسسات الخيرية | *777*10# |
| سحب كاش من فرع اتصالات | *777*11# |
| تاريخ العمليات السابقة | *777*12# |
| الإعدادات | *777*13# |
طريقة السحب والإيداع من فوري
طريقة ايداع اتصالات كاش من فوري
زور أقرب محل عنده ماكينة فوري وقوله عايز اعمل ايداع اتصالات كاش هيطلب منك رقم موبايلك والمبلغ اللى عايز تعمله ايداع ثم يطلب منك تأكيد الإيداع خلال 30 ثانية فقط ولتأكيد الإيداع اطلب من موبايلك *777*5# وبعدها ادخل رقمك السري الخاص بمحفظة اتصالات كاش ثم تصلك رسالة بنجاح عملية الإيداع والمبلغ اللى تم ايداعه
طريقة سحب اتصالات كاش من فوري
زور أقرب محل عنده ماكينة فوري متاح عنده السحب وقوله عايز اسحب مبلغ من اتصالات كاش هيطلب منك رقم موبايلك وهيسألك عايز تسحب كام ثم يطلب منك تأكيد السحب خلال 30 ثانية فقط ولتأكيد السحب اطلب من موبايلك *777*5# وبعدها ادخل رقمك السري الخاص بمحفظة اتصالات كاش ثم تصلك رسالة بنجاح عملية السحب ثم استلم الفلوس من صاحب المحل
رسوم السحب من فوري
1% من قيمة أي سحب كاش بحد أدنى 2 جنيه
الحد الأقصى للسحب والإيداع
- الحد الأقصى للتعاملات اليومية 30.000 جنيه
- الحد الأقصى لرصيد الحساب 50.000 جنيه
- حد السحب اليومي 30.000 جنيه
- الحد الأقصى للتعاملات الشهرية 100.000 جنيه
- حد السحب اليومي من المنافذ المختلفة 30.000 جنيه
- حد السحب اليومي للحساب الواحد من ATM هو 20.000 جنيه